老師傅

※

今天下午去刷鞋, 這是 TY 介紹過的戲完里後街檔, 還要排隊等之前個大班. 老師傅外貌已七八十, 牙齒丟掉大半, 仍是一副敬業樂業的精神, 態度專注工藝純熟, 口水和黑油混在一起抹在皮鞋上.

「之前個鬼佬對鞋好耐冇刷，搞左我鬼咁耐。佢對鞋本身係ling到反光，咁就仲煩。你呢對都好耐冇刷，好在本身唔ling, 唔駛搞咁耐。」
「刷多陣都冇人同你刷喇，冇人後繼呢行。鞋舖果ｄ呃人的，亂咁刷，唔好去。我做左好耐喇，六十年代果時同警察刷鞋，入軍營做，政府請，佢地對鞋要好ling架。 」
「好多人廿蚊再畀幾蚊貼士以為好威，其實鬼咁普通。老夫子有冇睇？之前有人黎刷鞋，話佢老豆係個作者王澤，走果時畀左四十蚊… 係兩張廿蚊歐羅呀！等於有四百幾蚊，我都冇兌返港紙，一張自己收一張拎畀女朋友留念，佢大陸女人未見過世面。」
「係呀，我女朋友係深圳… 唉，上面仲有個ＢＢ女添呀陰公！遲ｄ我去左冇人照顧，個女都唔知點算。生cancer呀我，唔涯得幾耐。」
「拍拖未？睇你都廿幾歲嗟，三十六歲至好結婚。儲多ｄ錢，有五十萬先好擺酒。讀完書未？打工拿，做緊咩呀？（小職員）有冇八千元個月…」
「後生仔唔好懶，學下自己刷鞋，唔洗成日黎搵我。莊士敦道油站, 福臨門酒家附近地庫, 一間舖頭賣日本黑色鞋油，十蚊樽咋，果度買埋刷都得。再用棉花刷，濕少少得喇好似咁（遞過來），卒一陣就掂。」
「你搵日放工再過來，我同你清埋條漬。呢ｄ好惡刷，要成個鐘架。」

咁慘情﹑咁專業又咁關照, 聽故仔聽到鼻酸, 留低四十蚊算了. 下次都唔知見唔見到佢勒.