智力遊戲日

來自：ywsing0
時間：Sun Feb 05 00:12:37 2006

1030 被史提芬來電叫醒. 總之不預期的手尾很多, 而我時間又少. 早知呢種錢難賺, 早知再叫高個價.
1200 往奧海城午膳. 唔夠衫流鼻水, 父讓了一件外套給我. 要多謝的. 往旺角逛書店.
1500 往太子, 上課.
1600 致電約翰．吳, 日式下午茶. 談起中小學時怎麼記過 (不介意公開罷?) －－
＊有一個科學實驗是用放大鏡聚焦在紙上生火. 吳率先作嚐試, 引得全班一起模仿, 見證科學的結果是一個缺點；
＊吳某天放學後忘了集會走了回家, 突然醒起跑回學校時遲到, 要見羅豔貞主任：「做乜集會遲到？」「我唔記得集會返左屋企。」羅完全不信：「我畀多個機會你講真話。你做乜遲到？」「我唔記得集會返左屋企。」於是又極有聊地得一缺點；
＊ＫＢ一腳印在吳褲，吳不忿還腿, 吳得缺點；
＊我在生物堂上跟陸濤紙筆下圍棋, 被梁迺文發現得缺點；
＊我跟許同學打架, 許踢我一腳, 我踢許一腳, 訓導主任聞之, 兩人皆得缺點.
（其實小弟仲有大把, 篇幅所限不用提了.）

小學時的范同學, 依稀記得當年一派高材生格調, 成績表靚數學尤勁, 捉象棋又常贏, 串串地咁樣, 後來拿好成績升中到男英文名校; 吳提起此人後來升學美國, 我第一感就諗條友係咪入左 MIT 或者 Princeton 讀緊工程定數理, 可能在外地已當專業人士. 得到的答案完全是兩回事－－大學邊間唔知, 佢讀的居然係音樂!! 近年已回港. 非常好奇佢玩乜野樂器...
還有吳嫌當年蘇同學在他座位後唱歌. 由小學開始我已經看不懂別人的愛情瓜葛.

1750 跟吳作別, hea 於旺角.
1900 智力遊戲夜. 會合堂兄堂弟, 到二樓 cafe 吃飯, 贏馬的堂兄請. (想講, 賭錢唔會常贏, 只有益左我) 食物可一讚, 環境... 令人累上加累.
波子棋很好玩, 規則簡單﹑變化複雜﹑不涉運氣﹑動腦筋﹑適合多人, 其實是極佳的棋戲. (有冇世界賽架?)
小弟一盤差一步 (堂弟先行取勝）﹑另一盤勝, 想到的大抵策略是－－
1. 波子要麼不動, 一跳就想法一次過跳到對面, 乾淨利落, 千祈唔好留係中間做人地既跑板;
2. 多動腦筋, 唔一定走得快好世界, 可能慢一步之後可以快好多, 退一步或許海濶天空;
3. 做人要賤, 唔好只掛住自己步法, 要去頂住人地 d 路;
4. 有時免不了波子停留的地方會給對手著數, 但應該選擇畀著數行得最慢果位對手, 千萬不要讓領先者走得更快;
5. 如果剩一粒要走遠路的時候, 就要想好兩條路線﹑移到適當位置. 只想一條很易被多位對手破壞.
只可惜這大陸製波子色澤太差, 暗淡燈光下分都唔易分得清, 如果可以粒粒光鮮閃ling ling必定趣味大增.
到恒信園手談, 小弟圍了模樣取勝.
堂弟到大陸繼續實習, 可能五月才會再見面. (咦, 拜山呢?)

今天不斷有人提起 Narnia, 老師還說愛看得看了兩次. 也許老師被類似耶穌復活般的寓意吸引吧, 我並不特別感興趣. 如果唔係老豆前幾日係街見到廿蚊翻版 DVD (真厲害!! hint: 土瓜灣), 我都冇機會睇下片段. 這種童話故事有點老掉牙. 造型的確很真實, 除了獅子倒下的片斷太明顯地人為之外. 有做的是, 逢人提起我就不斷誇耀「我個表哥有份整架」, 總之覺得自己沾晒光咁樣, 好威~