Sir Thomas Allen

為何這位出名歌手要來港, 答案兩個字: Michael Rippon. (居然係咁!)
跟巴弗洛提舖天蓋地的搵銀音樂會相比, 無論從宣傳﹑曲目﹑票價來看, 這位第一流男中音來港不見高調, 甚至懂得選擇大會堂坐人不多﹑優良音效的選址, 而不是文化中心的差劣級數音樂廳. 可以猜知艾倫爵士事業早已有成, 可以逍逍遙遙的過日子, 現在唱歌不再是為名為利, 想在那裏唱便在那裏唱﹑想唱甚麼便唱怎麼, 唯一所求是滿足自己﹑滿足知音, 了無牽掛. 對自己老年的狀態亦有自知之明, 亦不賣份量, 由頭至尾只精選約十首短曲. 「就因為佢識得揀，所以佢至係湯瑪斯艾倫。」這樣的音樂會, 真真正正令一眾真正識貨 (貧苦) 樂迷大快朵頤, 而不是替高官名流言歡取樂的社交宴會.

叫 "Sir" 的人小弟勉強認得兩位, 都是白髮飄飄﹑大方穩重﹑又老又型, 一頭半禿, 典型紳士風範, 這位還加上三分幽默﹑歌者的魅力. 英國人封爵的確有一手, 最少唔會街頭街尾亂咁派, 有道理﹑有準則, 非成就顯著的人不可得. 終究物以罕為貴, 學某某的媚洋說話, 英國爵士勳涵比甚麼大廁經昏漿, 矜貴多了.

樂團首先奏舒曼的甚麼曲子, 疲累的我沒睡著已是僥倖, 不很專心的聽只當替耳朵熱熱身. 聽完overture模模糊糊跟其他人一起拍掌, 諗諗下至知奶野, 好在過左個scherzo都記住唔拍了. btw我倒很眼利. 暇疵雖是有, 但朋友都說, 奏得不錯.

爵士首先演唱 Dvorak 的聖經歌曲, "This makes me recall my student days." 毀滅性的balance 樂團應該打屁股, 而艾倫爵士一派「你奏你的我唱我的」的風範, 總之呢隻歌應該只唱咁大聲就係咁多, 毫無頂住個樂團黎放聲. 其實以前睇電視同埋而家見呢位男中音唱歌, 佢都唔算 squillo singer, 真聲成份很重, 並不是輕易蓋過厚重樂團那種聲音. 總之結果是喧賓奪主﹑人聲不顯, 聽得沒癮, 也許只有數個用輕音唱上去的地方, 才突然聽到歌者的技巧.

佛漢威廉士的「財主與拉撒路」變奏曲, 並不特別感眼訓, 反正管弦樂我也不大懂聽. 唯一留意的是豎琴奏者雪白靈動的手指, 尤如蘭花穴拂手般輕巧優美撥弄弦線, 再加上面孔藏在琴後那種惹人遐思的誘惑, 好正. (真人就... 免提了.)

下半場一起, 「佢變左第二個人」, 果然唱歌劇時的聲音又大又響得多. Der vogelfanger bin ich ja 玩扮吹魔笛, 下下都對得岩果下厲害, 神情動作十足十, 實在又有得聽又有得睇. Vedro metr'io sospiro 又是一樣的中聽中看. 值得一提佢有變化嗓音的能力, 一時唱高音有如男高音般爆發﹑一時弄厚中音有如男低音一樣堅實, open/close玩弄於股掌之間, 雖然聽者未必完全適應, 但變化嗓音色彩, 類像六十年前傳奇歌手的失傳技巧.

重頭戲 Largo al factotum, 很多時聽來, 老年更沉厚的聲音的確似 Bryn Terfel! 玩弄般加了不少裝飾音, 證明呢首歌已被玩熟玩厭. 大抵責備一個六十來歲老人高音不夠自由﹑不夠放膽是一種挑剔, 只求聽到一個極具說服力的演繹版就心滿意足, 比起廖昌永, 完全看得出艾倫爵士在這曲上沉淫的日子長得多, 既細緻又豪放, 完全掌握了 barbiere 的精緒, 聽完一首歌聽眾夾在一起高呼.

Encore 來的是 Non piu andrai farfallone阿媽好囉唆, 粒Ｄ有slur之嫌, 結尾 low A 欠奉, 功架當然有, 但不如唱羅西尼的唱得好. 再清唱一首不知甚麼東東 (英國民歌?), 用輕聲把聲即刻返黎, 要清唱得有吸引力還真不易.

連男高音柯大衛都屈大拇指稱許.
「六十幾歲都唱到 Largo. 真係一流！你試下丫拿！
　果堆Ｇ好鬼係野，聽過唔少朋友死係呢首野手上……」