Carmen

全場爆滿. 畀我坐著第一行側邊的位.

全場最震憾力的竟是開幕前 prelude. 完場前這調子還會重覆一次.
(但前奏才奏了一半到小rest, 已有堆on9觀眾係度戇尻尻地拍掌. 卡門序曲幾乎是古典樂入門, 幾時完都唔識就摺埋啦死蠢.) 小rest係為左後面的管樂積蓄張力, 一拍手作曲家的心思就白費了, 再講奏完序曲都不必需要拍手. (後記: 聽返Levine指的卡門, 小提琴音色較好, 但大都會一樣有班on9仔聽到前奏個rest 就拍手.)

咱們這位卡門小姐由法國女士演出, 雖然一樣風騷, 但 (我說) 似法國風多過吉卜賽女郎. 聲音用了幾乎整個第一幕來熱身, 之後表現不錯. 對某些樂句沒有 legato 的處理我有保留.

男高音叫 Luca Lombardi, 聲音很拆, 就像卡列拉斯 1984 年的影帶般, 有種教不適的尖剌感. 高音有點困難, 感覺不輕鬆. 我覺得佢係屬於典型男高音唱壞嗓的情況. 聲音好像有點深沉, 但我猜他其實是抒情男高音, 原因他唱花之歌的第一粒音Ｆ是唱open 的. 真正的spinto通常要覆蓋粒Ｆ, 聽聽卡雷里或多明哥都是一樣. 看場刊, 台上這傢伙曾經在幾個著名聲樂大賽得獎, 照理以他現在的聲音質素唔會有機會囉獎. 再看, 這傢伙以前走去唱莎樂美﹑奧賽羅, 咁就怪唔得自己玩殘自己勒.

(注: 其實卡列拉斯大病之前歌聲已走下坡, 想聽聽真的他, 請找七十年代的錄音.)

歌聲最有印象的反是 Micaela, 技巧可稱完美, 她的高音是完全打開的那種漂亮, 圓渾有力, 有時還有won耳感覺. 跟唐阿塞唱母親回憶﹑和下定心志找毒梟的段茖, 都唱得輕巧精彩. 大細聲控制上佳, 情感內歛, 絕對有當歌劇女主角的天份.

孟浩文當鬥牛士樣子很襯, 對比之下另一邊廂廖昌永東方人胖圓臉的樣貌是位鬥牛士有點難以入信. 我始終覺得 Brian 高音Ｅ有點 wobble 以及 out-focussed, 雖然男中音聲音確是老而彌堅, 佢的中音Ｃ很夠power.

講配角, 而家香港變成了男中音氾濫, 人數實在很多. Morales的胡﹑Dancairo的關﹑及Escamillo的孟浩文, 另一邊還有林, 以後歌劇的男中音角色怕要爭崩頭. 是日本地歌手還有柯大衛, 清一色 APA 人都很稱職.

迪華特老婆的聲音很虛很淺, 氣息支持不夠. 另一個吉卜賽女同佢合唱, 兩個的聲音都差不多, 業餘味很重. 相信另一cast (葉 + 史) 會好很多.

合唱團表現麻麻, 女聲還可以, 男聲感覺很粗沙, 快速段落時常唔齊, 雖然結尾大合唱效果還好. 童聲其實很糟糕, 有的害羞得咀也開不夠大, 聲音如亂草, 有時還衝快. (練得不夠吧, 我說香港的兒童被縱壞了, 諗起林護果班只可以係自己禮堂練歌, 走遠d都唔肯.) 樂隊也好不了, 音色跟拍子很insecure, 始終有不入神之感. 指揮余隆指prelude 時involvement不如 Levine 的多.

值得一讚場景既真實又細緻, 三幕的佈景都不同, 煙廠由橫廊與梯子組成, 鬥牛場前還放一具雕塑, 心思﹑花費應不少.